Peqqinnissaqarfiup tulleriissaarinermut ataatsimiititaliaa pillugu Namminersornerullutik Oqartussat nalunaarutaat nr. 3, 31. januar 2001-imeersoq.
Peqqinnissaqarfiup sullissineri il.il pillugit Inatsisartut peqqussutaanni nr. 15-imi 6. november 1997-imeersumi § 22, imm. 3 tunngavigalugu aalajangersarneqarput:
§ 1. Killiliussat Naalakkersuisunit aalajangersarneqarsimasut iluanni Tulleriissaarinermut ataatsimiititaliap makku suliassarai:
1) naalakkersuinikkut aalajangikkat innimigalugit napparsimasunik katsorsaanermi tulleriissaarinissaq,
2) Kalaallit Nunaanni aamma Kalaallit Nunaannit innersuussinerit pillugit tunaartarisassaliornissaq taakkuninngalu nakkutiginninnissaq,
3) Rigshospitalimi katsorsaasarfinnilu Kalaallit Nunaata avataaniittuni allani atuineq malinnaaffigissallugu,
4) nakorsanit immikkut ilisimasalinnit sullinneqarnerup pingaarnerutillugu pilersaarusiorneqarneranik aammalu ingerlanneqarneranik nakkutilliinissaq aamma
5) suliassat inuup najugaqarfiata avataani peqqinnissaqarfimmi misissortinnissamut aamma katsorsarneqarnissamut innersuussinerit aalajangersimasut suliarissallugit.§ 2. Tulleriissaarinermut ataatsimiititaliami ilaasortaapput Dronning Ingridip Napparsimmavissuani nakorsat pisortaat, napparsimmavissuup pisortaa nakorsaanerillu aqutsisut, Peqqinnissamut Pisortaqarfimmit sinniisut marluk kiisalu Nuup peqqinnissaqarfiani nakorsat qullersaat najukkani peqqinnissaqarfiit sinniisaattut. Nuup peqqinnissaqarfiani nakorsat qullersaat najukkani peqqinnissaqarfinni allani sulinermik misilittagaqanngippat, Peqqinnissamut Naalakkersuisoq Nuup peqqinnissaqarfiani pisortap saniatigut allamik najukkami nakorsamik toqqaassaaq.
Imm. 2. Peqqinnissamut Naalakkersuisoq aalajangiissaaq ataatsimiititaliami ilaasortat arlaat kina siulittaasuussanersoq aamma siulittaasup tulliussanersoq. Siulittaasup peqannginnerani taassuma suliassai pisinnaatitaaffiilu siulittaasup tullianit suliarineqartassapput.§ 3. Tulleriissaarinermut ataatsimiititaliaq aalajangiisarpoq nalinginnaasumik amerlanerussuteqarnikkut. Amerlaqatigiinnik taasisoqartillugu siulittaasup taasinera aalajangiisuusassaaq.
Imm. 2. Ataatsimiititaliaq aalajangiisinnaassuseqassaaq siulittaasoq aamma ataatsimiititaliami ilaasortat ikinnerpaamik affaat najuuppata.
Imm. 3. Ataatsimiititaliap Dronning Ingridip Napparsimmavissuani nakorsaanerit tulleriissaarisartut suliassani tunngaviusunik aalajangiiffiusussaanngitsuni piginnaatissinnaavaa.§ 4. Tulleriissaarinermut ataatsimiititaliaq qaammatikkaartumik ataatsimiittassaaq. Siulittaasoq immikkut ittumik ataatsimiigiaqqusisinnaavoq.
Imm. 2. Ataatsimiititaliamut ataatsimiigiaqqusineq sivikinnerpaamik ullunik arfineq marlunnik piffissaqartitsilluni pisassaaq ilanngunneqartassallutillu ataatsimiinnermi oqaluuserisassat, minnerpaamillu makkuninnga imaqartassalluni:
1) Ataatsimiinerup kingulliup imaqarniliorneqarnerata akuerineqarnera.
2) Oqaluuserisassat akuerineqarnerat.
3) Kalaallit Nunaata avataani katsorsaasarfinnik atuineq pillugu paasissutissiineq
4) Utaqqisut allattorsimaffiat pillugu paasissutissiineq.
5) Angallassigasuarnerit pillugit paasissutissiineq.
6) Dronning Ingridip Napparsimmavissuaniit nunanut allanut innersuussinernut pingaaruteqartut pillugit paasissutissiineq.
7) Najukkani peqqinnissaqarfinni innersuussinernut pingaaruteqartut pillugit paasissutissiineq.
8) Suliassat erseqqissut suliarineqarneri.
9) Tamalaat.
Imm. 3. Dronning Ingridip Napparsimmavissua Tulleriissaarinermut ataatsimiititaliamut allattoqarfeqartitsisuussaaq.§ 5. Tulleriissaarinermut ataatsimiititaliap ataatsimiinneri matoqqasuupput. Pissutsit immikkut ittut atuuppata ataatsimiititaliap siulittaasua suliamut ilisimasalimmik qaaqqusisinnaavoq, ataatsimiititaliap suliamik suliarinninnermini atugassaanik oqaaseqartussamik.
§ 6. Ataatsimiititaliap ataatsimeereernerani imaqarniliortoqartassaaq ataatsimiititaliap suliai immikkoortuni ataasiakkaarlugit oqaluuserineqartut issuarlugit. Suliassani erseqqissuni inunnut ataasiakkaanut tunngasuni, tunngaviusussatut isikkoqartut, ilisarineqarsinnaajunnaarsillugit imaqarniliami ilanngullugit allaaserineqartassapput. Ataatsimiititaliap ataatsimiinnerinit imaqarniliat ataatsimiititaliap ilaasortaanut, Dronning Ingridip Napparsimmavissuani aqutsisunut, Peqqinnissamut Pisortaqarfimmut, Peqqinnissamut Naalakkersuisumut, najukkani peqqinnissaqarfinni nakorsat qullersaannut, Peqqinnissakkut Nakkutilliisoqarfimmut kiisalu Kalaallit Illuannut nassiunneqartassapput.
§ 7. Suliassani erseqqissuni inunnut ataasiakkaanut tunngasuni Tulleriissaarinermut ataatsimiititaliap aalajangiineri allattorneqartassapput aalajangiinerit allattaaviannut. Ilaasortap isummaminut tunngavilersuutini allattaavinnut naatsumik allanneqassasut piumasarisinnaavaa.
Imm. 2. Tulleriissaarinermut ataatsimiititaliap suliassani erseqqissuni inunnut ataasiakkaanut tunngasuni aalajangiineri nakorsamut napparsimasup ilisimatinneqarnissaanik isumaginnittussamut allakkatigut nalunaarutigineqartassapput. Suliasaq innuttaasup erseqqissumik qinnuteqarneratigut aallartinneqarsimappat tassani aalajangiineq pineqartumut allakkatigut nalunaarutigineqassaaq.
Imm. 3. Suliassami ataatsimiititaliap aalajangiivigisimasaani paasissutissat aalajangiinermut annertuumik sunniuteqartussat pissarsiarineqarpata suliassaq ataatsimiititaliap tigoqqissavaa nutaamik suliarissallugu.
Imm. 4. Tulleriissaarinermut ataatsimiititaliap suliani ataasiakkaani inunnut tunngasuni aalajangiinerit aqutsinikkut/allaffissornikkut oqartussamut allamut suliassanngorteqqinneqarsinnaanngillat.§ 8. Nalunaarut manna ulloq 15. februar 2001 aallarnerfigalugu atulersinneqarpoq.
Imm.2. Tamanna pillugu Tulleriissaarinermut ataatsimiititaliap Namminersornerullutik Oqartussat nalunaarutaani nr. 9, 19. marts 1998-imeersoq atorunnaarsinneqarpoq.
Namminersornerullutik Oqartussat, ulloq 31. januar 2001
Alfred Jakobsen/
Jørgen Dreyer